ललितपुर, कात्तिक ११ गते । बंगालको खाडीमा विकसित ‘अर्नब’ चक्रवातको प्रभावले वर्षा हुने सम्भावना बढेपछि ललितपुरको बुङमतीका किसान धान काट्न, झार्न र सुकाउन हतारिएका छन् । वर्षाले पाकेको धानमा क्षति पुग्ने जोखिमका कारण किसानले बाली सुरक्षित गर्न तीव्रता दिएका हुन् ।

बुङमतीकी किसान दिव्या तुलाधरका अनुसार ताइचिन धान सुकाउन १० दिनभन्दा बढी घाम चाहिन्छ । लगातार वर्षा हुँदा काटेर सुकाउन राखेको धान भिजेर उम्रिन सक्ने भएकाले आफूले छिटो धान काटेर सुकाउन थालेको उनले बताइन् ।

मौसम पूर्वानुमान महाशाखाले चक्रवातको प्रभावले कात्तिक १२ देखि १४ गतेसम्म देशका विभिन्न स्थानमा वर्षा तथा उच्च पहाडी र हिमाली क्षेत्रमा हिमपात हुन सक्ने जनाएको छ । कात्तिक १३ र १४ गते कोशी, मधेस, बागमती, गण्डकी र लुम्बिनी प्रदेशका केही स्थानमा भारी वर्षाको सम्भावना रहेको छ ।

धान काट्ने र भित्र्याउने समयमा वर्षा हुँदा उत्पादन र आम्दानीमा असर पर्न सक्ने भएकाले किसानलाई मौसमको पूर्वानुमानअनुसार बाली भित्र्याउन आग्रह गरिएको छ ।